இலங்கையின் கூட்டுறவுத்துறையின் மறுசீரமைப்பிற்கான பரிந்துரைகள்

ஓர் அர்ப்பணிப்புள்ள கூட்டுறவுச் சங்கம், அதன் உறுப்பினர்களுக்கான சமூக நல்வாழ்வை முன்னுரிமைப்படுத்துவதன் மூலம் நிலையான வளர்ச்சிக்கான தனித்துவமான வழியை வழங்கும். பல நாடுகளில், கூட்டுறவுகள் பொருளாதார மற்றும் சமூக முன்னேற்றத்தை ஊக்குவிக்கும் சக்திவாய்ந்த கருவியாக இயங்குகின்றன. இலங்கையில் போருக்குப் பிந்தைய மீட்புக் கட்டத்தில் உள்ள வடக்கு மற்றும் கிழக்கு மாகாணங்களில், கூட்டுறவு அமைப்புகள் நம்பகமான மாற்று சமூக, பொருளாதாரக் கட்டமைப்பாகத் திகழலாம். எனினும், கூட்டுறவுகளுக்கான உள்ளார்ந்த ஆதரவுக் கட்டமைப்பை உருவாக்கும் மனப்பான்மை எம்மத்தியில் மிகக் குறைவாகவே உள்ளது.

1769 ஆம் ஆண்டு ஸ்கொட்லாந்தின் ஃபென்விக் கிராமத்தில் உள்ளூர் நெசவாளர்கள் ஓட்ஸ் கஞ்சியைத் தள்ளுபடியில் விற்று, நுகர்வோர் கூட்டுறவான ஃபென்விக் நெசவாளர்கள் சங்கத்தை நிறுவினார்கள். அவர்கள் ஒரு சமூக மாற்றத் திசைக்கான முன்னோடியாக இருந்தனர். இன்று தனியார் மற்றும் பன்னாட்டு முதலீட்டாளர்களே மையமாக விளங்கினாலும், கூட்டுறவின் சர்வதேசப் பொருளாதாரச் சக்தி தடுக்க முடியாததும், விரிவானதும் ஆகும்.

1906ஆம் ஆண்டு, சின்சினாட்டி பல்கலைக்கழகப் பேராசிரியர் ஹெர்மன் ஷ்னைடர் தொடங்கிய முதல் கூட்டுறவுக் கல்வித் திட்டம், கல்வி அறிவுக்கும் நடைமுறை அனுபவத்துக்கும் இடையிலான இடைவெளியைக் குறைத்தது. அதன் வெற்றி, கூட்டுறவுக்கல்வியின் அவசியத்தை உலகம் ஏற்றுக்கொள்ள வழிவகுத்தது. இன்று, இந்தத் திட்டம் இன்டர்ன்ஷிப் மற்றும் வேலைவாய்ப்புகளை உள்ளடக்கியதாக விரிந்துள்ளது; ஆண்டுதோறும் ஆயிரக்கணக்கான மாணவர்கள் பங்கேற்கும் உலகின் மிகப்பெரிய கூட்டுறவுக் கல்வித் திட்டங்களில் ஒன்றாகத் திகழ்கிறது.

கூட்டுறவு நிறுவனங்கள் என்பன, உறுப்பினர்களால் சொந்தமாகவும் ஜனநாயக ரீதியாகவும் நிர்வகிக்கப்படும் வணிகங்கள் ஆகும். உறுப்பினர்கள் வாடிக்கையாளர்களாகவோ பயன்பெறுபவர்களாகவோ உள்ளடங்குகின்றனர். இவை சுய உதவி, சுய பொறுப்பு, ஜனநாயகம், சமத்துவம், ஒற்றுமை போன்ற கொள்கைகளின் அடிப்படையில் இயங்குகின்றன. சர்வதேசக் கூட்டுறவு அமைப்புகளின் கூட்டணி (ICA) குறித்துள்ளபடி, நேர்மை, வெளிப்படைத்தன்மை, சமூகப் பொறுப்பு மற்றும் பிறர் மீதான அக்கறை போன்ற நெறிமுறை மதிப்புகள் இவ்வமைப்புகளுக்கு வழிகாட்டுகின்றன. உலகளவில் பல கூட்டுறவுகள் மற்றும் அவற்றின் ‘பிராண்டு’கள் பல்வேறு தயாரிப்புகள் மற்றும் சேவைகளை வழங்குகின்றன.

கூட்டுறவுகளின் முன்னணி நிறுவனங்களில் UK-இன் Co-op குழுமம் குறிப்பிடத்தக்கது; இது Co-op, Irresistible, Free From, Gro, Honest Value போன்ற பிராண்டுகளை வழங்குகிறது. Groupe Crédit Agricole (பிரான்ஸ்) முக்கிய நிதிக் கூட்டுறவு நிறுவனமாகும். REWE (ஜெர்மனி) மற்றும் Coop (சுவிட்சர்லாந்து) ஆகியவை சில்லறை மற்றும் மொத்தச் சந்தைகளில் செயற்படும் முக்கிய ஐரோப்பியக் கூட்டுறவுகள். ICA (International Cooperative Alliance) 109 நாடுகளில் உறுப்பினர்களுடன் கூட்டுறவுகளுக்கான உலகளாவிய அமைப்பாகச் செயற்படுகிறது. Land O’Lakes மற்றும் Blue Diamond (அமெரிக்கா) ஆகியவை விவசாயிகளுக்குச் சொந்தமான கூட்டுறவுகள்; முறையே பால் மற்றும் பாதாம் பொருட்களில் நிபுணத்துவம் பெற்றவை. UK Co-op Food ஆனது CO-OP® GOLD, GOLD PURE®, MARKET TOWN®, ¢CENTSIBLES®, CARE+®, CO-OPERATIVE COFFEE, LUCKY DRAGON ஆகிய பிராண்டுகளையும் பயன்படுத்துகிறது. Groupe BPCE (பிரான்ஸ்) மற்றொரு முக்கிய நிதிக் கூட்டுறவு ஆகும். அமுல் (இந்தியா) தனது சர்வதேச வரம்பை விரிவுபடுத்தி, அமெரிக்கா, வளைகுடா, சிங்கப்பூர், பிலிப்பைன்ஸ், ஜப்பான், சீனா, அவுஸ்திரேலியா உள்ளிட்ட நாடுகளுக்கு பாற் பொருட்களை ஏற்றுமதி செய்கிறது; சமீபத்தில், ஸ்பெயின் மற்றும் ஐரோப்பிய ஒன்றியச் சந்தையில் COVAP கூட்டுறவுடன் இணைந்து நுழைந்துள்ளது. இந்த எல்லையற்ற வளர்ச்சி, உலகம் முழுவதும் கூட்டுறவுகள் எதிர்காலத்தை மாற்றும் வணிக வடிவங்களாகத் திகழும் என்பதைக் காட்டுகிறது.

இலங்கையில், குறிப்பாக போரால் பாதிக்கப்பட்ட பிரதேசங்களில், கூட்டுறவு அமைப்புகள் தொழில்நுட்பத் திறனற்ற நிர்வாகத்தால் பின்தங்கியுள்ளன. பல இடங்களில், மாவட்டக் கூட்டுறவுச் சமாசத்தின் நிர்வாகப் பொறுப்பு, பராமரிப்புத் தொழிலாளரிடம் உள்ளது. கூட்டுறவு அபிவிருத்தி உத்தியோகத்தர்களின் தொழிற்திறனே, துறை வளர்ச்சியை நிர்ணயிக்கும் நிலையில் உள்ளது. ஆனால் அவர்களின் திறனின்மையால், தொழில் வழிகாட்டலும் கணக்காய்வுத் தரவுகளைப் பயனுள்ளதாகும் பயன்பாடுகளும் உருவாக்கப்படுவதில்லை. இன்றைய கூட்டுறவுத் துறையின் வீழ்ச்சிக்கான அடிநாதம் தொழிற்திறன் குறைபாடே. இதை உணர்வதே அதன் எதிர்காலத்தை மீட்கும் முதல் படி.

முழுமையான தொழில்சார்ந்த கூட்டுறவுக் கல்வி, கல்வி மற்றும் தொழில்முறை உலகின் இடைவெளியைக் குறைத்து, பரஸ்பர நன்மைகளை உருவாக்கும். அது, நடைமுறை அனுபவத்தையும் கல்வியையும் இணைத்து, கூட்டுறவுத் துறையின் தொழிற்திறன் வளர்ச்சிக்கு அடித்தளமாகச் செயற்படுகிறது.

முக்கிய நன்மைகள்:

• கூட்டுறவின் நடைமுறைத் திறன் மேம்பாடு: நேரடி அனுபவம், தத்துவார்த்த அறிவை திறம்படப் பயன்படுத்த உதவுகிறது. 
• மேம்பட்ட வேலைவாய்ப்பு: பொருத்தமான நபர்கள் கூட்டுறவுப் பதவிகளைப் பெறமுடியும். குறிப்பாக கூட்டுறவுத்துறை வேலைச் சந்தையில் அவர்களின் போட்டித்தன்மையை அதிகரிக்க முடியும். 
• அறிவுத்துறை மற்றும் ஆய்வுத்துறை வளர்ச்சி: கூட்டுறவு அனுபவங்கள் தொழில் இலக்குகளை தெளிவுபடுத்துவதிலும், அவர்களின் எதிர்காலம் குறித்த முடிவுகளை எடுப்பதிலும் உதவுகின்றன.
• நிதி நன்மைகள்: கள அனுபவத்தைப் பெறும்போது பணம் சம்பாதிக்கிறார்கள். இதனால் கல்விச் செலவுகளை ஈடுசெய்ய முடியும்.
• தொழில்முறை மேம்பாடு: கூட்டுறவுக் கல்வி, குழுப்பணி மற்றும் தொடர்பு போன்ற மதிப்புமிக்க மென்மையான திறன்களை ஊக்குவிக்கும். 
• அதிகரித்த வருவாய்த் திறன்: கூட்டுறவுப் பங்கேற்பாளர்கள் பெரும்பாலும் அதிக சம்பளத்துடன் ஆரம்பகட்டப் பணியைத் தொடங்கி விரைவான தொழில் வளர்ச்சியை அடையமுடியும். 
• வலுவான கல்விச் செயற்திறன்: வகுப்பறைக் கற்றலை நாளாந்த உலக நடைமுறையுடன் இணைப்பதால், கல்வி தரும் பெறுபேறுகளை மேம்படுத்தலாம்.
• திறமைக்கான அணுகல்: கூட்டுறவு அமைப்புகளின் தேவைகளைத் தரக்கூடியவர்களின் வருகை. 
• குறைக்கப்பட்ட ஆட்சேர்ப்புச் செலவுகள்: இந்தத் திட்டங்கள் சாத்தியமான ஊழியர்களை அடையாளம் காணவும் மதிப்பீடு செய்யவும் உதவுகின்றன. இதனால் பணியமர்த்தல் செலவுகள் குறைகின்றன.
• சமூகப் பங்களிப்பு: வணிகங்கள், உள்ளூர்ப் பணியாளர் மேம்பாடு மற்றும் கல்வி முயற்சிகளை ஆதரிக்கின்றன.
• குறைக்கப்பட்ட பயிற்சிச் செலவுகள்: விரிவான பயிற்சிக்கான தேவையைக் குறைக்கும் அடிப்படை அறிவை மாணவர்கள் கொண்டு வருகிறார்கள்.

கல்வி நிறுவனங்களுக்கான நன்மைகள்:

• மேம்படுத்தப்பட்ட திட்டப் பொருத்தம்: நிறுவனங்கள், தொழிலாளர் சந்தைத் தேவைகளுடன் ஒத்துப்போகின்றன. தற்போதைய நிலையில் வலுவிழந்து போகும் பாடத்திட்டங்களைச் செம்மைப்படுத்துகின்றன.
• வலுவான சமூக உறவுகள்: கூட்டுறவு நிறுவனங்கள் மற்றும் உள்ளூர் வணிகங்களுக்கு இடையே ஒத்துழைப்பை வளர்க்கின்றன.
• மேம்படுத்தப்பட்ட நற்பெயர்: நன்கு வளர்ந்த கூட்டுறவு அமைப்புகள் திறமையான பணியாளர்களை ஈர்க்கின்றன மற்றும் நிறுவன நிலையை அதிகரிக்கின்றன.

கூட்டுறவுகளின் வளர்ச்சி மற்றும் நிலைத்தன்மைக்கு முழுமையான முகாமைத்துவம், நிர்வாகம், பயிற்சி மற்றும் தொழில்நுட்பத் திறன்களை உள்ளடக்கிய தொழில்முறை நிபுணத்துவம் அவசியம். இவை சவால்களை எதிர்கொள்வதற்கும், உறுப்பினர்களுக்குச் சிறப்பான சேவையை வழங்குவதற்கும், தொடர்ந்த வளர்ச்சியை உறுதி செய்வதற்கும் அவசியமானவை.

1. முழுமையான முகாமைத்துவ மேலாண்மை மற்றும் நிர்வாகம் (Governance and Administration):

• தலைமைத்துவம்: திறமையான கூட்டுறவு அபிவிருத்திசார் தொழில்சார் அதிகாரிகள் மூலோபாயத் திட்டமிடல், முடிவெடுத்தல் மற்றும் திறமையான செயற்பாடுகளில் வழிகாட்டுதலை வழங்குகிறார்கள்.
• நிதி மேலாண்மை: கூட்டுறவுகள், உறுதியான நிதி நடைமுறைகளைப் பேண நிபுணர்கள் அவசியம். குறிப்பாக, சமாசங்கள் மற்றும் மாகாணச் சம்மேளனங்கள் நிபுணத்துவக் குழாமின்றிச் செயற்பட்டால், படிப்படியாகச் சரிவை நோக்கிச் செல்லலாம். 
• கூட்டுறவுச் சட்டப் பிரயோகம்: சட்ட மற்றும் ஒழுங்குமுறைக் கட்டமைப்புகள் பற்றிய அறிவு, சட்டபூர்வச் செயற்பாடுகளுக்கு அவசியம். தேசிய மற்றும் மாகாண நியதிச்சட்டங்களைப் புரிந்து செயற்படத் தவறினால், பல்வேறு சட்டச் சிக்கல்கள் காலப்போக்கில் உருவாகும்.

2. பயிற்சி மற்றும் திறன் மேம்பாடு:

• திறன் மேம்பாடு: நிபுணர் தலைமையிலான பயிற்சி, உறுப்பினர்கள் மற்றும் ஊழியர்கள் வணிகங்களையும் சந்தைத் தயாரிப்புகளையும் திறம்பட நிர்வகிக்க உதவுகிறது.
• அறிவுப் பரிமாற்றம்: நிபுணத்துவம், சிறந்த நடைமுறைகள் மற்றும் புதுமையான அணுகுமுறைகளைப் பகிர்ந்துகொள்ள உதவுகிறது.
• கண்காணிப்பு, மதிப்பீடு, பொறுப்புக்கூறல் மற்றும் கற்றல் மேம்பாடு (Monitoring, Evaluation, Accountability and Learning): செயற்பாடுகளை அளவிடுவதிலும் சந்தை மாற்றங்களுக்கு ஏற்ப மாற்றுவதிலும் கூட்டுறவு நிறுவனங்களுக்கு வல்லுநர்கள் தேவை அல்லது அவர்களின் உசாத்துணை கிடைக்கவேண்டும். 

3. தொழில்நுட்பத் திறன்கள்:

• தொழில் அறிவு: விவசாயம் அல்லது மீன்வளம் போன்ற துறைகளில் சிறப்பு அறிவு தனிப்பயனாக்கப்பட்ட ஆதரவை வழங்குகிறது.
• தொழில்நுட்பத்தை ஏற்றுக்கொள்வது: கூட்டுறவு நிறுவனங்களின் டிஜிட்டல் தீர்வுகளை செயற்படுத்தவும் செயற்திறனை மேம்படுத்தவும் நிபுணர்கள் உதவுகிறார்கள்.
• வள அணுகல்: கூட்டுறவு வளர்ச்சிக்கு நிதி மற்றும் வளங்களைப் பெறுவதில் நிபுணத்துவம் மிக முக்கியமானது.

4. சமூக மற்றும் பொருளாதாரத் தாக்கம்:

• வறுமைக் குறைப்பு: நன்கு நிர்வகிக்கப்படும் கூட்டுறவு நிறுவனங்கள் பொருளாதார வாய்ப்புகளை உருவாக்குகின்றன; சமூகங்களை மேம்படுத்துகின்றன.
• சமூக மேம்பாடு: அவை வேலைகளை உருவாக்குவதன் மூலமும் உள்ளூர் உட்கட்டமைப்பை மேம்படுத்துவதன் மூலமும் பங்களிக்கின்றன.
• நிலையான மேம்பாடு: நிபுணர்களின் ஆதரவு சுற்றுச்சூழலுக்கு உகந்த நடைமுறைகள் மற்றும் சமூக சமத்துவத்தை ஊக்குவிக்கிறது.

சுருக்கமாக, தொழில்முறை நிபுணத்துவம், கூட்டுறவு நிறுவனங்கள் திறமை, நிலைத்தன்மை மற்றும் பயன்தன்மையை நோக்கிச் செயற்பட உதவுகிறது. 

தற்போது, கூட்டுறவின் வீழ்ச்சித் திசையை விளக்கும் புதிய கள ஆய்வுகள் வெளிவந்துள்ளன. இவை இளம் கூட்டுறவுகளின் பார்வைகளைப் பதிவு செய்து, இளைஞர்களையும் கூட்டுறவுகளையும் பற்றிய விலைமதிப்பான நுண்ணறிவுகளை வழங்குகின்றன. வடக்கு மற்றும் கிழக்குப் பகுதிகளில் நிலவும் போருக்குப் பிந்தைய சமூக, பொருளாதார நெருக்கடிகளை முன்னிறுத்தும் இவ்வாய்வுகள், இளைஞர் ஈடுபாட்டை மேம்படுத்த புதிய அறிவைப் பெறுதல் அவசியம் என்பதை வெளிப்படுத்துகின்றன. இந்த ஆய்வுகள், இளைஞர் கூட்டுறவுக்கான புதிய முயற்சிகளுக்குத் தன்னம்பிக்கையை வழங்குகின்றன. கூட்டுறவு மாதிரியை ஊக்குவித்து, சமூக வளர்ச்சியை நோக்கி இளைஞர் தொழில்முனைவைக் கட்டியெழுப்புவது இன்றியமையாதது.

கூட்டுறவுத் துறையில் இளைஞர் ஈடுபாட்டிற்கான சவால்கள் மற்றும் தடைகள்

ஜனநாயகப் பங்கேற்பு மற்றும் திறந்த உறுப்பினர் தன்னார்வம் ஆகிய கூட்டுறவுக் கொள்கைகள் இளைஞர் ஈடுபாட்டை ஊக்குவிக்கும் என எதிர்பார்க்கப்படுகிறது. இது இளைஞர் மைய நிர்வாகம் மற்றும் ஒத்துழைப்பின் விழிப்புணர்வை உயர்த்தும் எனக் கருதப்படுகிறது. ஆனால், அண்மைய ஆய்வுகள் இவ்வெதிர்பார்ப்பு ஏன் நிறைவேறவில்லை என்பதற்கான காரணங்களை வெளிக்கொணர்கின்றன. இலங்கையின் சூழலில் முக்கிய சவால்கள் பின்வருமாறு:

• கூட்டுறவுகளின் கருத்துகள்: கூட்டுறவின் தொழிற்படும் தன்மை பற்றி வளர்ந்துவரும் இளம் சந்ததி முற்றாக அறியாதநிலை கவனிப்பிற்குரியது. கூட்டுறவுகளின் கருத்துகள் பற்றிய தெளிவின்மை மற்றும் புரிதலின்மை இளைஞர் ஈடுபாட்டிற்கு ஒரு குறிப்பிடத்தக்க தடையாக இருப்பதாகப் பல ஆய்வுகள் குறிப்பிடுகின்றன.
• உள்ளடக்கம் மற்றும் உரையாடல் இல்லாமை: இளைஞர்களுக்கும் பிற கூட்டுறவு உறுப்பினர்களுக்கும் இடையில் உள்ளடக்கம் மற்றும் உரையாடலுக்கான பயனுள்ள வழிமுறைகள் பெரும்பாலும் இல்லை.
• கட்டமைப்பில் நெகிழ்வுத்தன்மை: பங்கேற்பை ஊக்குவிக்கும் இளைஞர் நட்புக் கட்டமைப்புகளை அறிமுகப்படுத்துவதற்குத் தேவையான நெகிழ்வுத்தன்மை மற்றும் தகவமைப்புத் திறன் பல கூட்டுறவு நிறுவனங்களுக்கு இல்லை.
• எதிர்மறை அர்த்தங்கள்: இளைஞர்கள் பெரும்பாலும் கூட்டுறவுகளை ஊழல், அரசின் கூட்டு முயற்சி அல்லது காலாவதியான மற்றும் லாபமற்ற மாதிரி போன்ற எதிர்மறையான கருத்துகளுடன் தொடர்புபடுத்துகிறார்கள். இவை நிறுவனங்கள் மற்றும் செயற்பாடுகளுக்கான இலட்சியத் திட்டங்கள் மற்றும் யோசனைகளைக் கொண்ட இளைஞர்களுக்கு கூட்டுறவுகளை விரும்பத்தகாததாகத் தோன்றச் செய்கின்றன. 
• கூட்டுறவு மாதிரி பற்றிய வரையறுக்கப்பட்ட அறிவு: இளைஞர்களிடம் கூட்டுறவு மாதிரி, அதன் நன்மைகள் மற்றும் தனித்துவங்கள் குறித்த தெளிவான புரிதல் இல்லை. சர்வதேசக் கொள்கைகள் மற்றும் கூட்டுறவுக் கலாசார மதிப்புகள் பற்றிய அறிவின்மை, ஆர்வமின்மையைத் தூண்டுகின்றன. இதனால், அடிமட்டச் சங்கங்கள் முதல் சம்மேளனங்கள் வரை, கூட்டுறவுகள் முதியோர்களின் அமைப்பாக மாறிவருகின்றன. இச்சவால்களை எதிர்கொள்வதே இளைஞர்களின் ஈடுபாட்டை மேம்படுத்தும் வழியாகும்.

இலங்கையின் கல்விப் பாடத்திட்டங்களில் கூட்டுறவுக்கு மதிப்பான பிரதிநிதித்துவம் இல்லை. இது கல்விக் கட்டமைப்பில் ஒதுக்குதலை உருவாக்குகிறது. இது பற்றிய விழிப்புணர்வும், கூட்டுறவுக்கு உரிய இடம் அளிக்கும் முயற்சிகளும், சமூக அக்கறையும் இளம் தலைமுறையின் ஆர்வத்தை ஊக்குவிக்கக்கூடும். ILO உள்ளிட்ட ஆய்வுகள், கல்விக்கொள்கையில் கூட்டுறவுக்கு அக்கறை குறைவதாகத் தெரிவிக்கின்றன. வணிகம் மற்றும் பொருளாதாரம் குறித்த முக்கிய துறைகளில், குறிப்பாக பல்கலைக்கழகத் துறைகளில், பங்கு நிறுவன மாதிரிகளுக்கு முன்னுரிமை வழங்கப்படும் நிலையால், கூட்டுறவுக்கான சமமான ஒதுக்கீட்டை மறுக்கும் போக்கு உருவாகின்றது.

மேலும், இளம் கூட்டுறவு உறுப்பினர்கள் அல்லது இளைஞர்கள் தலைமையிலான கூட்டுறவுகளுக்கு இன்னும் பல முட்டுக்கட்டைகள் தொடர்கின்றன. 

1. மூலதனத்தை அணுகுதல்.

2. பெரிய நிறுவனங்களுடன் போட்டியிடும் கூட்டுறவுகள், பொருளாதார நெருக்கடிகளிலும் மீளமைப்புகளிலும், சுய உதவிச் சேவைகளை வழங்கிவரும் போதும், அவற்றின் வகிபாகம் மீதான அக்கறையின்மை மற்றும் மத்திய – மாகாண ஒத்தாசையின்மை காரணமாக சந்தைத் தோல்வியைச் சந்திக்கின்றன. கூட்டுறவுக்கான பொருளாதாரச் சந்தைப் பொறிமுறை புறக்கணிக்கப்படுவதால், செயற்திறன் குறையவும், இளம் கூட்டுறவுகள் வளர்ச்சியை இழக்கவும் வாய்ப்பு உள்ளது.

3. சந்தைகளுக்கான அணுகல்.

4. செயற்படுத்தும் சூழல்கள் மற்றும் ஒழுங்குமுறைக் கட்டமைப்புகளை உருவாக்குதல்.

5. வளங்கள், தொழில்நுட்ப ஆதரவு அல்லது தகவல் மற்றும் அறிவுப் பகிர்வு இல்லாமை.

6. கூட்டுறவுக் கும்பங்களின் வலையமைப்பு துண்டுபட்டுக் காணப்படுவதால் ஆதரவுக் கட்டமைப்புகளிலிருந்து தனிமைப்படுதல்.

போருக்குப் பிந்தைய இலங்கையில், சமூக மீட்பு மற்றும் நிலையான வாழ்வாதார மேம்பாட்டுக்கான முயற்சிகளில் கூட்டுறவுகள் முக்கியமானவை. இவைகளை உருவாக்கவும் வலுப்படுத்தவும் அரசுசாரா நிறுவனங்கள் (என்ஜிஓக்கள்) முக்கிய பங்கு வகிக்கக்கூடும். ஆனால், போரால் பாதிக்கப்பட்ட பகுதிகளில் கூட்டுறவுகள் எதிர்கொள்ளும் இருத்தலியல் சவால்கள் காரணமாக, என்ஜிஓ ஆதரவு குறைவாகவே உள்ளது. பலர் கூட்டுறவுகளை அரசுத் துறையின் நீட்சியாகப் பார்க்கின்றனர்; இது வளர்ச்சிக்கு இடையூறாகிறது. மேலும், கூட்டுறவுத் திணைக்களங்களுடனான ஒத்துழைப்பிலும், அதன் அதிகாரச் சவால்களிலும் சிக்கல்கள் உள்ளன. அரசுசாரா நிறுவனங்கள் நிலையான வளர்ச்சிப் பாதைகளை உண்மையிலேயே ஆதரிக்க விரும்பினால், கூட்டுறவுகள் இந்த முயற்சிகளின் அடிப்படைக் கூறுகளாக அங்கீகரிக்கப்பட வேண்டும். அதற்கான சில வழிகள் இங்கே.

1. பொருளாதார மேம்பாடு மற்றும் வாழ்வாதாரம்:

• வளங்கள் மற்றும் சந்தைகளுக்கான அணுகல்: கூட்டுறவு நிறுவனங்கள் நிதி, பயிற்சி மற்றும் தொழில்நுட்பம் போன்ற அத்தியாவசிய வளங்களை அணுகுவதில் உதவ முடியும். இந்த ஆதரவு அவர்களின் உற்பத்தி மற்றும் சந்தைப்படுத்தல் திறன்களை மேம்படுத்துகிறது.
• வேலை உருவாக்கம் மற்றும் வருமான உருவாக்கம்: அரசு சாரா நிறுவனங்களின் ஆதரவுடன், கூட்டுறவு நிறுவனங்கள் வேலைவாய்ப்புகளை உருவாக்கி, மோதலால் வாழ்வாதாரம் பாதிக்கப்பட்ட கிராமப்புறங்களில் உறுப்பினர்கள் வருமானம் ஈட்டக்கூடிய அமைப்புகளாக உருவெடுக்கலாம்.
• நிலையான நடைமுறைகள்: அரசு சாரா நிறுவனங்கள், நிலையான நீண்டகால அபிவிருத்தி நடைமுறைகளைப் பின்தொடர்ந்து, சுற்றுச்சூழலுக்கு உகந்த உற்பத்தி முறைகள் மற்றும் வள மேலாண்மையை ஊக்குவிப்பதில் கூட்டுறவு நிறுவனங்களை வழிநடத்த முடியும்.

2. சமூக ஒற்றுமை மற்றும் மோதல் மாற்றம்:

• நம்பிக்கை மற்றும் ஒற்றுமையை உருவாக்குதல்: அரசு சாரா நிறுவனங்களால் வசதியளிக்கப்படும் கூட்டுறவு நிறுவனங்கள், பல்வேறு சமூகங்களிடையே சமூக ஒற்றுமை மற்றும் நம்பிக்கையை வளர்க்க முடியும். இது நல்லிணக்கம் மற்றும் அமைதியான சகவாழ்வை ஊக்குவிக்கிறது.
• சமூக அதிகாரமளித்தல்: பங்கேற்பு முடிவெடுப்பதில் ஈடுபடுவதன் மூலம், கூட்டுறவு நிறுவனங்கள் தனிநபர்கள் மற்றும் சமூகங்களுக்கு அதிகாரம் அளித்து, அவர்களின் வளர்ச்சியில் அவர்களுக்கான குரலை வழங்கமுடியும். 
• மோதலின் மூல காரணங்களை நிவர்த்தி செய்தல்: வறுமை, சமத்துவமின்மை மற்றும் வளங்களை அணுக முடியாமை போன்ற மோதலுக்குப் பங்களிக்கும் அடிப்படைப் பிரச்சினைகளைச் சமாளிக்க அரசு சாரா நிறுவனங்கள் கூட்டுறவு நிறுவனங்களுடன் பங்காளியாகலாம்.
• கூட்டுறவுச் சட்டத்தை ஊக்குவித்தல்: கூட்டுறவு நிறுவனங்களின் வளர்ச்சி மற்றும் மேம்பாட்டை ஊக்குவிக்க, அரசு சாரா நிறுவனங்கள், ஆதரவான கொள்கைகள் மற்றும் சட்டக் கட்டமைப்புகளை தங்கள் நடவடிக்கைகளில் உள்ளடக்கலாம்.
• விழிப்புணர்வை ஏற்படுத்துதல்: கூட்டுறவு நிறுவனங்களின் நன்மைகள் மற்றும் மோதலுக்குப் பிந்தைய மீட்சியில் அவற்றின் நேர்மறையான தாக்கம் குறித்த பொது விழிப்புணர்வை அரசு சாரா நிறுவனங்கள் அதிகரிக்கலாம். 

3. அரசு சாரா நிறுவனங்களின் ஈடுபாட்டின் எடுத்துக்காட்டுகள்:

• மறுவாழ்வு மற்றும் மீள்குடியேற்றம்: போருக்குப் பின்பு, இடம்பெயர்ந்த மக்களை மீள்குடியேற்றுவதிலும் அவர்களின் வாழ்வாதாரத்தை மீண்டும் கட்டியெழுப்புவதிலும் அரசு சாரா நிறுவனங்கள் கூட்டுறவு நிறுவனங்களை உள்ளடக்கி ஒரு பரந்த அபிவிருத்தித் தளத்தை உருவாக்க முடியும். 
• பயிற்சி மற்றும் திறன் மேம்பாடு: வணிக மேலாண்மை, நிதி, கல்வியறிவு மற்றும் பிற தொடர்புடைய திறன்களில் கூட்டுறவு உறுப்பினர்களுக்கு அரசு சாரா நிறுவனங்கள் பயிற்சி அளிக்கமுடியும்.
• சந்தைகளுக்கான அணுகல்: அரசு சாரா நிறுவனங்கள், கூட்டுறவு நிறுவனங்கள் தங்கள் தயாரிப்புகள் மற்றும் சேவைகளை விற்பனை செய்ய, உள்நாட்டு மற்றும் சர்வதேச சந்தைகளுடன் இணைவதற்கு உதவலாம். 
• அரசியல் ஸ்திரமின்மை: அரசு சாரா நிறுவனங்களால் ஆதரிக்கப்படும் கூட்டுறவுகளின் வெற்றி, அரசியல் ஸ்திரமின்மை மற்றும் அரசாங்கக் கொள்கைகளில் ஏற்படும் மாற்றங்களால் பாதிக்கப்படும்போது, அரசு சாரா நிறுவனங்கள் அதில் தலையிடமுடியும். 
• ஊழல் மற்றும் தவறான மேலாண்மை: அரசு சாரா நிறுவனங்கள் ஊழல் மற்றும் தவறான மேலாண்மையைத் தடுக்க, கூட்டுறவு நிறுவனங்களுடனான தங்கள் பணிகளில் வெளிப்படைத்தன்மை மற்றும் பொறுப்புணர்வை உறுதி செய்ய முடியும். 
• நிலைத்தன்மை: கூட்டுறவு நிறுவனங்களின் நீண்டகால நிலைத்தன்மையை உருவாக்குவதில் அரசு சாரா நிறுவனங்கள் கவனம் செலுத்த வேண்டும், ஆரம்ப ஆதரவு கட்டத்திற்குப் பிறகும் அவை தொடர்ந்தும் செழித்து வளர்வதை உறுதி செய்ய வேண்டும்.

ஒட்டுமொத்தமாக, மோதலுக்குப் பிந்தைய இலங்கையில், கூட்டுறவுகள் வழியாக பொருளாதார மீட்சி, சமூக ஒற்றுமை மற்றும் நீடித்த அமைதியை மேம்படுத்த அரசு சாரா நிறுவனங்கள் முக்கிய பங்கு வகிக்கின்றன.

இலங்கையின் கூட்டுறவுத்துறை

இலங்கையில் கூட்டுறவு இயக்கமும் அதன் இயங்கு தளமான கூட்டுறவுச் சங்க அமைப்பும் 1906 ஆம் ஆண்டு பிரிட்டிஷ் காலனித்துவ காலத்தில் கிராமப்புற விவசாயச் சமூகத்தின் பொருளாதாரத் தேவைகளைம, கடன்கள் மற்றும் பிற நிதிச் சேவைகளை வழங்குவதன் மூலம் நிவர்த்தி செய்வதற்காகத் தொடங்கப்பட்டன.

தேசிய, மாகாண அரசாங்கங்கள் 1995 ஆம் ஆண்டில் ICA வெளியிட்ட கூட்டுறவு அடையாள அறிக்கையை ஏற்றுக்கொள்ளவில்லை. தற்போதைய சட்ட அமைப்பு 1966 இல் உருவான பழைய கொள்கைகளையே பிரதிபலிக்கிறது. தற்போதைய தேசிய சட்டம் 1972 ஆம் ஆண்டு பிறப்பிக்கப்பட்ட 5 ஆம் எண் கூட்டுறவுச் சங்கச் சட்டத்தின்படி இயங்குகிறது; அதில் 1983 ஆம் ஆண்டு மற்றும் 1992 ஆம் ஆண்டுத் திருத்தங்களும் இணைக்கப்பட்டுள்ளன.

1987 ஆம் ஆண்டின் 13 ஆம் எண் அரசியலமைப்புத் திருத்தத்துக்குப் பிறகு, கூட்டுறவுகள் மாகாண சபைகளுக்குப் பகிரப்பட்டாலும், ஒன்பது மாகாணங்களில் ஆறு மட்டுமே தங்கள் சட்டங்களை உருவாக்கியுள்ளன. மீதமுள்ளவை 1972 சட்டத்தின் கீழ் இயங்குகின்றன. உருவாக்கப்பட்ட சட்டங்கள் பெரும்பாலும் அசல் சட்டத்தின் சிறிய திருத்தங்களாகும். அவை கூட்டுறவுக் கொள்கைகளுடனான இணக்கம் குறித்த விவாதங்களைத் தூண்டுகின்றன.

கட்டமைப்பு ரீதியாக, இலங்கையின் பல கூட்டுறவுகள் காலாவதியானவை மற்றும் உலகமயமாக்கப்பட்ட சந்தைப் பொருளாதாரத்தில் நவீன சமூக நிறுவனத் தேவைகளுக்கு ஏற்ப மாறத் தவறியவை. ஐக்கிய நாடுகள் சபையின் நிலையான வளர்ச்சி இலக்குகள் (SDGs) மற்றும் சர்வதேச கூட்டுறவுக் கூட்டணி (ICA) ஆகியன முக்கியத்துவம் அளிக்கும் சவால்களை எதிர்கொள்ள அவை போதுமானதாக இல்லை.

இலங்கையின் வடக்கு மற்றும் கிழக்கு மாகாண சபைகள், தேசிய கூட்டுறவு அமைச்சகத்துடன் இணைந்து, போரினால் பாதிக்கப்பட்ட பகுதிகளில் கூட்டுறவுகளை மேம்படுத்தும் தனித்துவமான வகிபாகத்தை மேற்கொள்கின்றன. உள்ளூர்க் கூட்டுறவுச் சமூகங்களுக்கு வழிகாட்டி, ஆதரவு வழங்கி, மாகாணங்களின் கூட்டுறவு வளர்ச்சியை முன்னெடுக்கும் பொறுப்பு மாகாண சபைகளினுடையது ஆகும். தேசிய கூட்டுறவு அமைச்சகம் கொள்கைகளை ஒருங்கிணைத்து, மாகாணங்களின் நடவடிக்கைகளையும் ஒருங்கிணைக்கும் முக்கிய பொறுப்பை வகிக்கின்றது.

மாகாண கூட்டுறவுத் திணைக்களத்தின் பொறுப்புகள்:

• பதிவு மற்றும் கண்காணிப்பு: அந்தந்த மாகாணங்களுக்குள் கூட்டுறவுச் சங்கங்களின் செயற்பாடுகளைப் பதிவுசெய்து கண்காணித்தல். இந்தச் சங்கங்கள் விதிமுறைகளுக்கு இணங்குவதையும் திறம்பட செயற்படுவதையும் அவை உறுதி செய்கின்றன.
• வழிகாட்டுதல் மற்றும் ஆதரவு: கூட்டுறவுச் சங்கங்களின் முகாமைத்துவ மேலாண்மை, நிதி, செயற்திறன் மற்றும் சேவை வழங்கலை மேம்படுத்துவதற்கு வழிகாட்டுதல், பயிற்சி மற்றும் ஆதரவு நல்குதல். 
• கூட்டுறவு மதிப்புகளை ஊக்குவித்தல்: கூட்டுறவுக் கொள்கைகள் மற்றும் மதிப்புகளை மேம்படுத்துவதற்கும், சமூகப் பங்கேற்பு மற்றும் அதிகாரமளிப்பை வளர்ப்பதற்குமான பொறுப்புக் கொண்டவை. 
• உள்ளூர்த் தேவைகளில் கவனம்: மாகாணத்திற்குள் கூட்டுறவுத் துறையின் குறிப்பிட்ட தேவைகள் மற்றும் சவால்களுக்கு ஏற்ப தங்கள் ஆதரவை வடிவமைப்பதில் முக்கிய பாத்திரம் வகிக்க வேண்டியவை.  

தேசிய கூட்டுறவு அமைச்சகத்தின் பொறுப்புகள்:

• கொள்கை உருவாக்கம்: கூட்டுறவு இயக்கத்தில் வளர்ச்சியை ஏற்படுத்துவதை நோக்கமாகக் கொண்ட தேசிய கொள்கைகள் மற்றும் உத்திகளை உருவாக்குவதற்கு இந்த அமைச்சகம் பொறுப்பாகும்.
• தேசிய ஒருங்கிணைப்பு: இது மாகாணத் துறைகளின் செயற்பாடுகளை ஒருங்கிணைக்கிறது; தேசிய கொள்கைகளைச் செயற்படுத்துவதில் நிலைத்தன்மையை உறுதி செய்கிறது. மாவட்டம், மாகாணம் மற்றும் அனைத்துத் தீவு மட்டங்களிலும் செயற்படும் கூட்டுறவுச் சங்கங்களை அமைச்சகம் பதிவு செய்து கண்காணிக்கிறது. 
• தேசிய மேம்பாட்டுத் திட்டங்கள்: தேசிய கூட்டுறவு மேம்பாட்டுத் திட்டங்கள் மற்றும் முன்முயற்சிகளை ஆதரிக்கிறது; அவை ஒட்டுமொத்தத் தேசிய வளர்ச்சி நிகழ்ச்சிநிரலுடன் ஒத்துப்போவதை உறுதி செய்கிறது.
• இடைவெளியைக் குறைத்தல்: மாகாண மற்றும் உள்ளூர் மட்டங்களில் தேசிய கொள்கைகளுக்கும் கூட்டுறவு இயக்கத்தின் நடைமுறை யதார்த்தங்களுக்கும் இடையிலான இடைவெளியைக் குறைக்க அமைச்சகம் செயற்படுகிறது. 

மாகாணத் துறைகள், உள்ளூர் மட்டத்தில் கூட்டுறவு வளர்ச்சியைச் செயற்படுத்துகின்றன. அதேநேரத்தில் தேசிய அமைச்சகம் இலங்கையின் முழுக் கூட்டுறவுத் துறைக்கும் பொதுவான கட்டமைப்பையும் திசையையும் வழங்குகிறது.

இலங்கையின் கூட்டுறவுத்துறை ஏராளமான சவால்களை எதிர்கொள்கிறது:

• காலாவதியான சட்டம்: கூட்டுறவுகளுக்கான சட்டக் கட்டமைப்பு 1970களில் சோசலிச நோக்குடன் உருவானது. இலங்கை தாராளமய பொருளாதாரக் கொள்கைகளை ஏற்றுக்கொண்ட பின்னர், அந்தச் சட்டம் பொருந்தாத நிலையில் உள்ளது. 2000 ஆம் ஆண்டு தனியார் துறைக்காக மேற்கொள்ளப்பட்ட சீர்திருத்தங்களைப் போலவே, பதிவாளரின் பங்கை மறுவரையறை செய்து, ஒரு பொருத்தமான ஒழுங்குமுறை அமைப்பை உருவாக்க வேண்டும்.
• நவீன மேலாண்மை அமைப்புகளின் பற்றாக்குறை: 1970களுக்குப் பிறகு, கூட்டுறவுகள் மேலாண்மை அமைப்புகளை புதுப்பிக்கவில்லை; அதன் தொழில்நுட்பம் காலாவதியானது. செயல்திறன் விதிமுறைகள் மற்றும் குறிகாட்டிகள் இல்லாதது, அவற்றின் செயற்பாட்டை கடுமையாகப் பாதித்துள்ளது. தவறான நிதி மேலாண்மை, மோசமான முதலீடுகள் மற்றும் தனியார் நிதி நிறுவனங்களுடனான போட்டி காரணமாக பல கிராமப்புற வங்கிக் கூட்டுறவுகள் திவாலாகியுள்ளன. இதைத் தீர்க்க பயனுள்ள ஒழுங்குமுறைகள் இல்லை.
• பாரம்பரிய அரசியல் தலைமை: கூட்டுறவுகளில் அரசியல் ஆதிக்கம் தீவிரமாகவே நீடிக்கிறது; நிர்வாகம் அரசுடன் நெருங்கிய அரசியல் குழுவின் கட்டுப்பாட்டில் உள்ளது. சட்டங்கள் மற்றும் துணைச் சட்டங்கள் அரசியல் அழுத்தங்களை ஊக்குவித்து, கூட்டுறவின் தனித்துவத்தைக் கடுமையாகச் சவாலுக்கு உட்படுத்துகின்றன. இது குறைபாடுகளை நிலைத்தவையாக மாற்றுகிறது. அரசியல் தூண்டுதலுடன் செயற்படும் தலைவர்கள் தெளிவான திசையை வழங்கவில்லை.
• பலவீனமான ஒழுங்குமுறைப் பொறிமுறை: முந்தைய காலங்களில் கூட்டுறவுகள் அதிகாரிகளால் நெறிப்படுத்தப்பட்டன. ஆனால் 1987 இல் மாகாண சபைகளுக்கு பொறுப்புகள் மாற்றப்பட்டதிலிருந்து ஒழுங்குமுறை மேற்பார்வை குறைவடைந்தது. பல கூட்டுறவுகள் அரசால் உருவாக்கப்பட்டவை. இன்று நிலவும் பலவீனமான முறைகள், குறிப்பாக நிதி மற்றும் பல்நோக்குத் துறைகளில், ஊழலை ஊக்குவிக்கின்றன. மேலும், ஒழுங்குமுறை அதிகாரிகளுக்கான, திறமைமிக்க ஊழியர்களுக்கான தட்டுப்பாடும் உள்ளது.
• போலிக் கூட்டுறவுகளின் தோற்றம்: சிறப்புப் பணியாளர்களின் குறைவால், குறிப்பாக நிதித் துறையில், போலிக் கூட்டுறவுகள் அதிகம் பதிவாகின. கடந்த தசாப்தத்தில் இவை பெரிதும் எண்ணிக்கையில் அதிகரித்தன. இன்று அவற்றில் பல அமைப்புகள் செயலிழந்துள்ளன. பல மோசடி வழக்குகள் நீதிமன்றத்தில் நிலுவையில் உள்ளன. புதிய கூட்டுறவுகள் மற்றும் வணிகத் திட்டங்களை மதிப்பீடு செய்ய, ஒழுங்குமுறை அமைப்புகளுக்கு தேவையான திறன் இல்லை.
• கூட்டுறவு நிபுணர்களின் சரிவு: அதிகாரப் பகிர்வால், ஒழுங்குமுறை ஊழியர்களை உருவாக்கிய முந்தைய கூட்டுறவுப் பயிற்சி அமைப்பு வீழ்ந்தது. செயற்பாடுகள் கடுமையாகப் பாதிக்கப்பட்டன. மாகாணங்களுக்குப் பொறுப்புகள் மாற்றப்பட்டாலும், பயிற்சிகள் ஒழுங்குமுறையாகக் கட்டமைக்கப்படவில்லை.
• காலாவதியான பயிற்சி அமைப்புகள்: கூட்டுறவு ஊழியர்களுக்கான பயிற்சி மற்றும் மேம்பாட்டுத் திட்டம் 1970களில் உருவான காலாவதியான தேர்வுப் பாடத்திட்டத்தை மையமாகக் கொண்டது. பாடத்திட்டம், வழிமுறை, உள்ளடக்கம் எதுவும் புதுப்பிக்கப்படவில்லை. பயிற்சி, ஊழியர் ஆணைய விதிகளுக்கேற்ப பதவி உயர்வோடு மட்டுமே தொடர்புடையதாகும். இதனால், நிறுவன நிர்வாகத்தில் உள்ள தற்போதைய சவால்களை எதிர்கொள்வதில் பயிற்சி முறைகள் தோல்வியடைந்துள்ளன.
• தலைமைத்துவப் பயிற்சிக்கான போதுமான வளங்கள் இல்லாமை: தேசிய கூட்டுறவுக் கவுன்சில் மற்றும் பிற தேசிய அளவிலான வணிகக் கூட்டமைப்புகளில் போதுமான வளங்கள் இல்லை, இது தலைமைத்துவப் பயிற்சியை எதிர்மறையாகப் பாதித்துள்ளது. NCC இல் பயிற்சியாளர்களின் எண்ணிக்கை குறைவாக உள்ளது; அவர்களின் திறன்களும் போதுமானதாக இல்லை. இதன் விளைவாக, தலைமைத்துவப் பயிற்சியின் தரம் குறைந்துள்ளது. இது கூட்டுறவு நிர்வாகத்தின் ஒட்டுமொத்தச் செயற்திறனைப் பாதிக்கிறது.
• உறுப்பினர்களை விட திறந்த சந்தைகளில் கவனம் செலுத்துதல்: பல பல்நோக்குக் கூட்டுறவுச் சங்கங்கள் (MPCSகள்) மற்றும் கடன் கூட்டுறவுகள், உறுப்பினர்கள் அல்லாதவர்களிடமிருந்து நிதி சேகரிப்பதில் கவனம் செலுத்தி, அவற்றின் முதலீடுகளில் ஏற்றத்தாழ்வை உருவாக்கியுள்ளன. இந்த மாற்றம் வெளிப்புற முதலீடுகளுக்கு ஆதரவாக உறுப்பினர்களின் வளத் தேவைகளைப் புறக்கணிக்க வழிவகுத்தது. இதன் விளைவாக ஊழல் நடைமுறைகள் ஏற்பட்டன. கடன் மேற்பார்வையும் பலவீனமாக உள்ளது. மேலும், சில்லறை விற்பனைத் துறையில், கூட்டுறவுப் பல்பொருள் அங்காடிகள் மற்றும் கடைகள், உறுப்பினர்களின் நுகர்வோர் தேவைகளை நிவர்த்தி செய்வதைவிட பிற துறைகளுடன் போட்டியை முன்னுரிமைப்படுத்துகின்றன; கூட்டுறவு நிறுவனங்களின் அடிப்படைக் கொள்கைகளைப் பலவீனப்படுத்துகின்றன.

கூட்டுறவு நிறுவனங்களுக்கான வாய்ப்புகள்

தற்போதைய இலங்கையின் பொருளாதாரத்திலும் உலகளாவிய போக்குகளிலும் கூட்டுறவு நிறுவனங்கள் புத்துயிர்பெற வழிவகுக்கும் வாய்ப்புகள் உருவாகி வருகின்றன. 

• சமூக வாழ்க்கை முறைகளில் மாற்றங்கள்: சமீபத்திய இறக்குமதி வரி மாற்றங்கள் நுகர்வோர் பொருட்களின் இறக்குமதியைக் குறைத்துள்ளன. இதனால் நடுத்தர மற்றும் குறைந்த வருமானக் குழுக்கள் உள்ளூர் உற்பத்தியை ஆதரிக்கத் தொடங்கியுள்ளன. இந்த மாற்றம் விவசாயப் பொருட்கள் மற்றும் வீட்டுத் தேவைகளுக்குப் பொருத்தமானதாகும். புதிய கூட்டுறவுகளும் சிறுதொழில் கூட்டுறவுகளும் அதிகரிக்கின்றன. உள்ளூர் விவசாய உள்ளீடுகள் மற்றும் கருவிகளுக்கான தேவை உயர்ந்ததால், கூட்டுறவின் முக்கியத்துவம் மேலோங்கியுள்ளது.
• புதிய தலைமுறை நிறுவனங்கள்: தற்போதைய வேலைவாய்ப்பு நெருக்கடியால் சுயதொழில்கல் அதிகரித்து வருகின்றன. அதிக மூலதனத்துடன் கூடிய நிதிக் கூட்டுறவுகள் பல்வேறு சுயதொழில் திட்டங்களை ஆதரிக்க முடியும். பாரம்பரிய முதலீடுகள் போதுமான ஈவுத்தொகையை வழங்காததால், கூட்டுறவு ஏற்பாடுகள் இதற்கான மாற்றாக அமையலாம். தனியார் துறை இதற்கு ஆதரவு தெரிவிப்பதால், இந்தப் போக்கு தற்போது வலுவடைந்து வருகிறது. கூட்டுறவு நிதி நிறுவனங்களும் இதனைப் பின்பற்ற வேண்டும்.
• அரசாங்கத்தின் அலட்சியம்: சமீபத்தில், நெருக்கடியின் போது, அத்தியாவசியப் பொருட்கள் மற்றும் நெல் கொள்முதல் செயல்களில், அரசு கூட்டுறவுகளைத் தவிர்த்து, தனிப்பட்ட நிறுவனங்களை நம்பியது. அதேசமயம், சில கூட்டுறவுகள் உள்ளூர் சமூகங்களுக்குத் தொடர்ந்து சேவை செய்ததன் மூலம், மக்களிடையே நம்பிக்கை பெற்றுள்ளன. அரசின் அலட்சியம் கூட்டுறவுகளை சுயாதீன முயற்சிகளை மேற்கொள்ள ஊக்குவித்துள்ளது.
• சுற்றுச்சூழல் பாதிப்புகள்: இயற்கைப் பேரிடர்களால் பாதிக்கப்படும் இலங்கையில், சுற்றுச்சூழல் விழிப்புணர்வு அதிகரித்து வருகிறது. இச்சூழ்நிலை மோசமடைய நெறிமுறையற்ற நிறுவனங்கள் காரணமென்பது பொதுமக்களுக்குத் தெளிவாகியுள்ளது. தற்போதைய நெருக்கடி, சமூகப் பொறுப்பும் சிறந்த நடைமுறைகளும் அவசியம் என்பதைக் கட்டாயமாக்கியுள்ளது. நெறிமுறை மற்றும் நிலைத்தன்மையைப் பின்பற்றும் கூட்டுறவுகள் இந்த வாய்ப்பைப் பயன்படுத்தி முன்னிலை வகிக்கலாம். தலைவர்கள் மற்றும் தொழில்முனைவோர் மாற்றத்திற்கான அவசரத் தேவையை ஏற்படுத்த வேண்டும்.
• வேலையின்மை மற்றும் பெரிய தொழில்களின் சரிவு: கடந்தகால பொருளாதார நெருக்கடி, நிறுவனங்கள் மூடப்பட்டமை, வெளிநாட்டு முதலீட்டாளர்கள் திரும்பப்பெறுதல், மேம்பாட்டுத் திட்டங்கள் நிறுத்தப்படுதல் மற்றும் பெருநிறுவன ஆட்குறைப்புக் காரணமாக பல தொழிலாளர்கள் இடம்பெயர்ந்துள்ளனர். இதனால் கிராமப்புறங்களில் வாழ்வாதாரப் பாதுகாப்புக் குறைந்துள்ளதுடன், நகர்ப்புறங்களில் தொழில் தேடல் போட்டியும் அதிகரித்துள்ளது. இந்தச் சூழலில், தன்னிறைவு வாய்ந்த வேலைவாய்ப்புகளுக்கான தேவையும், மாற்றுப் பொருளாதார அமைப்புகளின் முக்கியத்துவமும் மேலோங்கியுள்ளது.
• நிதிச் சந்தை நெருக்கடி: இலங்கை நிதிச் சந்தை கடுமையான சரிவை எதிர்கொள்கிறது. அரசாங்கம் நிதி நிறுவனங்களை கடனாளிகளுக்கு நிவாரணம் வழங்க வலியுறுத்தினாலும், அது இன்னும் செயற்படுத்தப்படவில்லை. பல நுண்நிதி நிறுவனங்கள் மூடப்பட்டதால், வைப்பாளிகள் ஆபத்தில் உள்ளனர். இதனிடையே, நிதிக் கூட்டுறவுகள் மீள்தன்மையை நிரூபித்துள்ளன. இந்நிலையில், அவை சிறந்த உத்திகளைச் செயற்படுத்தி நுண்நிதிச் சந்தையை வழிநடத்த முடியும். கூட்டுறவுகள் தங்கள் சொந்த மூலதனத்திலும் விதிமுறைகளிலும் செயற்படுகின்றன. மேலும் அவை, உள்ளடக்கிய உத்திகளைப் பின்பற்றுவதன் மூலம் குறைந்த வருமானக் குழுக்களுக்கு நிதி அணுகலை உறுதி செய்யவும் முடியும்.

முடிவு

இலங்கையில் கூட்டுறவுத்துறையின் செயற்திறன் கடுமையாகப் பாதிக்கப்பட்டுள்ளது. ஆதார வலுவாக்கமும், வளர்ச்சி மீதான கவனமும் இல்லாத நிலை தொடர்கின்றது. தொழில் திறனும் பரப்பும் சுருங்கி, சில கூட்டுறவுகள் முதியோர் கூடங்களாகவும், குடும்பச் சொத்தாகவும், அரசியல் கருவியாகவும் மாறியுள்ளன. இளைஞர்களின் ஈடுபாடு குறைந்துள்ள நிலையில், மாற்றம் அவசியப்படுகின்றது. அர்ப்பணிப்புக் கொண்ட இளைஞர்கள் புதிய தொழில்நுட்பங்கள் மற்றும் தொழில் வாய்ப்புகளை இணைத்து, புதிய கூட்டுறவுகளை உருவாக்க வேண்டும். முதலில், கூட்டுறவுத் திணைக்கள உத்தியோகத்தர்களும் நிர்வாகிகளும் தொழில்முனைவோர் பார்வையுடன் செயற்படவேண்டும். இதுவே மாற்றத்துக்கான தளமாக அமையும்.  

இந்தியாவின் முதல் தேசிய கூட்டுறவுப் பல்கலைக்கழகமான திரிபுவன் சஹ்காரி பல்கலைக்கழகம் குஜராத்தின் ஆனந்தில் அமைந்துள்ளது. ‘ஒத்துழைப்பு மூலம் செழிப்பு’ என்ற அரசு நோக்குடன் இணைந்து, கல்வி வாயிலாக கூட்டுறவுத்துறையை வலுப்படுத்துகிறது. அமுலின் நிறுவனர் திரிபுவன்தாஸ் கிஷிபாய் படேலிற்கு இந்தப் பல்கலைக்கழகம் அஞ்சலி செலுத்துகிறது. இவர்தான் சர்தார் வல்லபாய் படேலுடன் இணைந்து குஜராத் மற்றும் இந்தியா முழுவதும் கூட்டுறவு இயக்கத்தை மாற்றியமைத்தவர். 

திரிபுவன் சஹ்காரி பல்கலைக்கழகம் கூட்டு மேலாண்மை, கணக்கியல், நிதி, சந்தைப்படுத்தல், கூட்டுறவுச் சட்டம் மற்றும் கிராமப்புற மேம்பாட்டில் பட்டம், டிப்ளோமா, பிஎச்டி திட்டங்கள் மூலம் கூட்டுறவுத் துறையை வலுப்படுத்துகிறது. பால் பண்ணை, மீன்வளம், விவசாயக் கடன் கூட்டுறவுகள் ஆகிய துறைகளில் கவனம் செலுத்தி, ஐந்து ஆண்டுகளில் 2 மில்லியனுக்கும் மேற்பட்ட நிபுணர்களை பயிற்றுவிப்பதை இலக்காகக் கொண்டுள்ளது. வெளிப்படைத்தன்மை, புதுமை மற்றும் சிறந்த நடைமுறைகளை ஊக்குவிக்க, கிராமப்புறக் கூட்டுறவுகளுக்கான பிரத்தியேக ஆராய்ச்சி மற்றும் மேம்பாட்டுப் பிரிவும் உருவாக்கப்படுகிறது.

எங்களுக்கு இரண்டு கூட்டுறவுப் பல்கலைக்கழகங்கள் தேவை – வடக்கில் திரு. வீரசிங்கம் அவர்களின் பெயரில், கிழக்கில் திரு. தேவநாயகம் அவர்களின் பெயரில். இவ்வாறு நிறுவப்பட்டால்தான் வடக்கு – கிழக்குப் பகுதிகளில் கூட்டுறவுத்துறைக்குத் தேவையான வளர்ச்சி ஏற்படும்.