நீண்டகாலப் பண்பாட்டுப் பங்களிப்புகளையும் கலை மேதமையையும் வெளிப்படுத்திய பல்துறை சார்ந்த ஆளுமைகள் பற்றி அம்முன்னோடிகளின் பங்களிப்பை, வாழ்க்கையை, கலையைத் தொகுத்து அறிவதென்பது நாம் வாழ்ந்து கொண்டிருக்கும் வரலாற்றை உருவாக்கிய தொடுபுள்ளிகளை இணைத்து ஒரு பண்பாட்டுக்கலை வரலாற்றை உருவாக்கிக் கொள்வதற்காக. அதற்கான ஒரு வழிவகையாக இலங்கைத் தமிழ்ச்சூழலில் உருக்கொண்ட காண்பியக் கலைஞர்களின் தொகுக்கப்பட்ட சிந்தனை, அனுபவங்களை நுணுக்கமாக வெளிக்கொணரும் நேர்காணல் தொடராக ‘கோட்டில் கேட்கும் சங்கீதம்: காண்பியப் படைப்பாளிகளுடனான நேர்காணல்’ எனும் இத்தொடர் அமையும்.
மொழி-பிரதி வழியில்லாத கலை வடிவத்தினைப் பிரதானமாக வெளிப்படுத்தும் காண்பியப் படைப்பாளிகளின் கலைவடிவம் தொடர்பான பரிச்சயமின்மையால் பொதுச்சூழலில் அவர்களை விளங்கிக்கொள்வதில் இடர்பாடுகளுண்டு. சர்வதேச கலைவெளிகளில் பிரபலமாக இருக்கும் அவர்கள் தமிழில் பதியப்படாமலும், உள்ளூரில் போதியளவு அறியப்படாமலும் இருப்பது தொடர் உரையாடலுக்கான தேவையைச் சுட்டுகிறது. சமூக நுண்ணுணர்வின் உணர்கொம்புகளாக இருக்கும் படைப்பாளிகளின் கலைவாழ்வு அனுபவங்களை விரிவாகத் தொகுத்து அவதானிப்பது அவர்களது கலை, அறிவு, இரசனைப் பங்களிப்பினை அறிந்து மேம்பட்ட சமூகத்திற்கான இரசனையையும் சூழலையும் உருவாக்கி சமூகத்தை முன்னோக்கி நகர்த்துவதற்கே.
இந்நேர்காணல் தொடர் காண்பியப் படைப்பாளிகளின் படைப்புலகையும் பண்பாட்டுப் பங்களிப்பினையும் அவர்களது கலைமனம் திரண்டுவந்த பின்புலம், கலைப்படைப்பு, படைப்புகள் வெளிக்கொணரும் பாடுபொருட்களின் சூழ்நிலவரங்கள், கலை-அழகியல், கலைச் செயற்பாடுகள், கலை வரலாறு, கலை உலகில் கலைச்சந்தை என அவர்களது பார்வைகள், அனுபவங்களையும் திரட்டி வழங்குவதாக இருக்கும்.
