‘கிளர்ச்சி ஒடுக்குமுறையும் இனப்படுகொலையும்: அரச வன்முறையின் வரலாற்றை ஆராய்தல்’ எனும் இத்தொடர், அரச பாதுகாப்பு நடவடிக்கைகளின் பெயரால் ஒரு மக்கள் குழுவே அழிவின் இலக்காக மாறுகின்றமையை இலங்கையை மையமாகக் கொண்டு ஆராய்கிறது. காலனித்துவக் காலம் முதல் போருக்குப் பிந்தைய இராணுவமயமாக்கல் வரை அரச அதிகாரம், இராணுவ மூலோபாயம், இனப்படுகொலை, சர்வதேசச் சட்டம் ஆகியவற்றுக்கு இடையிலான உறவுகளை இது மதிப்பிடுகிறது.
அரச வன்முறையைத் திட்டமிடுபவர்கள், உத்தரவிடுபவர்கள், செயல்படுத்துபவர்கள், அவர்களுக்குத் துணைநிற்கும் நிறுவனங்கள் மீது இவ்வாய்வு கவனம் கொள்கின்றது. அரசியல் தலைமை, இராணுவம், காவல்துறை, புலனாய்வுத் துறை, அரச நிர்வாகம் ஆகியவற்றுக்கு இடையே அதிகாரம் எவ்வாறு பிரித்தளிக்கப்படுகிறது என்பதை இது விளக்குவதுடன்; வெளிநாட்டுப் பயிற்சி, ஆயுத உதவி, உளவுத் தகவல்கள் பரிமாற்றம், இராஜதந்திர ஆதரவுகள் ஆகியவை இவ்வன்முறைச் செயல்பாடுகளுக்கு எவ்வாறு பலம் சேர்க்கின்றன என்பதையும் பகுப்பாய்வு செய்கிறது.
அரசாங்கப் பதிவுகள், இராணுவ வெளியீடுகள், அதிகாரிகளின் ஆய்வேடுகள், நினைவுக் குறிப்புகள், இராஜதந்திரப் பதிவுகள், நீதிமன்றப் பதிவுகள், விசாரணை அறிக்கைகள் ஆகியவற்றை அடிப்படையாகக் கொண்டு, வன்முறை ஒழுங்கமைக்கப்படும் விதத்தையும் அது நியாயப்படுத்தப்படுவதையும் வெளிப்படுத்தும் இத்தொடர், அரச அதிகாரத்தை விமர்சனபூர்வமாகப் புரிந்துகொள்ளும் ஆய்வுக் கோணத்தைத் தமிழ் வாசகர்களுக்கு வழங்குகிறது.
