ஈழத் தமிழர்களின் சமகால அரசியல், சமூக மற்றும் பொருளாதார வாழ்வில் "நிலம்” என்பது வெறும் புவியியல் பரப்பாக மட்டுப்படுவதில்லை. அது அடையாளம், வாழ்வாதாரம், நினைவு, அதிகாரம் மற்றும் எதிர்காலம் ஆகியவற்றோடு ஆழமாகப் பிணைந்திருக்கும் அரசியல் வெளியாகும். போருக்குப் பின்னரும் வடக்கு-கிழக்கு சமூகங்களில் நிலம் தொடர்பான பிரச்சினைகள் மக்களின் வாழ்க்கையின் அனைத்துப் பரிமாணங்களையும் பாதித்து வருகின்றன. இதனை நுண்ணரசியல் (Micropolitics) நோக்கில் ஆய்வு செய்வது, அன்றாட வாழ்க்கையில் அதிகாரம் எவ்வாறு செயல்படுகிறது என்பதைப் புரிந்துகொள்ள உதவுகிறது.

நுண்ணரசியல் என்பது தேசிய அல்லது மாகாண அளவிலான பெரிய அரசியல் நிகழ்வுகளை மட்டுமன்றி, கிராமம், குடும்பம், சமூக அமைப்புகள், பெண்கள் குழுக்கள், மீனவர் சங்கங்கள், விவசாயிகள் மற்றும் இடம்பெயர்ந்த மக்களின் அன்றாட உறவுகளுக்குள் அதிகாரம் எவ்வாறு வெளிப்படுகிறது என்பதை ஆராயும் அணுகுமுறையாகும். ஈழத்தின் சூழலில் நில உரிமை, மீள்குடியேற்றம், வளப்பகிர்வு, இராணுவமயமாக்கல் மற்றும் அபிவிருத்தித் திட்டங்கள் ஆகியவை இந்த நுண்ணரசியல் செயல்பாடுகளின் முக்கிய கூறுகளாக விளங்குகின்றன.

தமிழ்ச் சமூகத்தில் நிலம் என்பது வெறும் பொருளாதார வளம் அல்ல; அது வரலாற்றுரிமை, பண்பாட்டு நினைவகம், வாழ்வாதாரத்தின் அடித்தளம் மற்றும் சமூக உறவுகளின் மையமாகக் கருதப்படுகிறது. போரின் விளைவாக எண்ணற்ற குடும்பங்கள் தங்களது நிலங்களையும் வாழ்வாதார ஆதாரங்களையும் இழந்தன. போருக்குப் பின்னர் நில மீட்பு, நிலக் கையகப்படுத்தல், இராணுவ ஆக்கிரமிப்பு மற்றும் அரசின் நிலக் கொள்கைகள் பல்வேறு முரண்பாடுகளையும் சிக்கல்களையும் உருவாக்கியுள்ளன.

வடக்கு மற்றும் கிழக்கில் போருக்குப் பின்னர் இராணுவத்தின் நிலப்பயன்பாடு பல்வேறு விவாதங்களுக்கு வழிவகுத்துள்ளது. பாதுகாப்பு வலயங்கள், இராணுவ முகாம்கள், சுற்றுலா மற்றும் வணிக நடவடிக்கைகளுக்காக நிலங்கள் பயன்படுத்தப்படுவதால் மக்களின் மீள்குடியேற்ற முயற்சிகள் பாதிக்கப்பட்டுள்ளன என்று பல சமூக அமைப்புகள் சுட்டிக்காட்டுகின்றன. நுண்ணரசியல் பார்வையில் இது அரசுக்கும் மக்களுக்கும் இடையிலான அதிகார உறவுகளின் இயல்பை வெளிப்படுத்துகிறது. நிலத்தின் மீதான கட்டுப்பாடு, சமூக வாழ்வையும் நிர்வகிக்கும் ஓர் அதிகாரக் கருவியாக இங்கு செயல்படுகிறது.

போருக்குப் பின்னர் முன்னெடுக்கப்பட்ட அபிவிருத்தித் திட்டங்கள் மக்களின் வாழ்க்கையில் புதிய வாய்ப்புகளையும் அதே நேரத்தில் புதிய சவால்களையும் உருவாக்கியுள்ளன. விவசாய நிலங்களை தொழில் அல்லது சுற்றுலாத் திட்டங்களுக்காக மாற்றுதல், கடற்கரை வளங்களின் மீதான போட்டிகள், பாரம்பரிய வாழ்வாதாரங்களின் சுருக்கம் மற்றும் இளைஞர்களின் இடப்பெயர்வு போன்ற மாற்றங்கள் பொருளாதார அமைப்புகளை மட்டுமல்லாது சமூக அதிகார உறவுகளையும் மாற்றியமைத்துள்ளன.

இந்தத் தொகுப்பின் நோக்கம், தொடர்ச்சியாக நிலவி வரும் சமூக மற்றும் பொருளாதார அழுத்தங்களால் உருவாகும் வாழ்வியல் சுமைகளையும் அவற்றின் பின்னணியில் உள்ள நுண்ணிய அரசியல் இயக்கங்களையும் வெளிக்கொணர்வதாகும். பதினொரு கட்டுரைகளை உள்ளடக்கிய இத்தொகுப்பு “நிலமும் வாழ்வும்: ஈழத்தின் சமகாலம் மீதான நுண்ணரசியல் பார்வைகள்” என்ற தலைப்பில் எழுநா பதிப்பகத்தின் வெளியீடாக வெளிவருவது பெரும் மகிழ்ச்சிக்குரியதாகும்.

எழுநாவிற்காக எழுதுவதற்கு ஊக்கத்தையும் தொடர்ச்சியான ஒத்துழைப்பையும் வழங்கிய அண்ணன் செல்வின் அவர்களுக்கு எனது மனமார்ந்த நன்றிகளைத் தெரிவித்துக்கொள்கிறேன். எழுநாவில் வெளிவந்த கட்டுரைகளுக்கு வாசகர்கள் வழங்கிய வரவேற்பும், இதுபோன்ற மேலும் பல கட்டுரைகள் வெளியாக வேண்டும் என்ற அவர்களது எதிர்பார்ப்பும் இந்நூலைத் தொகுப்பதற்கான உற்சாகத்தை அளித்தன.

இக்கட்டுரைகளைச் செம்மைப்படுத்தி வெளியீட்டுக்குத் தயார்ப்படுத்துவதில் உதவிய எழுநா பதிப்பகக் குழுமத்தினருக்கும், திரு. சசீவன் அவர்களுக்கும் எனது உளமார்ந்த நன்றிகளைத் தெரிவித்துக்கொள்கிறேன்.

வை.ஜெயமுருகன்